Médam, zé Mésyé, la sosyété, koz avèk moins é koz èk in kouyon, mé sé o pyé d’lo mir k’i oi lo bon mason. Mézami, kozman mi sort mark anlèr-la, moin lé sir zot i koné sa. An touléka, mi rapèl mi koné ali dopi bélaz é botan : moin téi antann mon famiy di sa, kan téi zoué dan la kour avèk bann marmaye téi di sa galman, sanm pou moin dann mon liv Dumas - liv léktir moin téi ansèrv étab pti - l’avé in zistoir téi anparl sa. An touléka, nout tout i koné kosa i vé dir : sinploman si ou i port pa antansyon out bien, lé riskab volèr i pran pou li. Kisoi out plas, kisoi out zanimo, kisoi ankor in ta kékshoz lé volab. Zot i souvien la bélètte la kapar lo tèryé lo jenn lapin é solon La fontaine la pa port ali la shans é la pa port non pli la bélète ma shans pars in shat téi apèl Raminagrobis la manz inn é l’ot. Volèr i prospèr pa ? Sa in bob sa pars dann in sosyété volèr konm sak ni koné, volèr i prospèr é pa po zoué. Alé ! Mi kite azot rofléshi la dsi é ni artrouv pli d’van. Sipétadyé.