A ! La piblisité, sa in n’afèr lé asé agasan. I pé mèm dir, dann bann vil, dann bann kartyé, dann bann vilaz, mèm dann bann gafourn pèrdi, la piblisité sé in vré polisyon : l’apré di dmoun manz tèl shoz, boir tèl shoz, mète tèl linz, friksone out mizo avèk tèl pomad… Lé konmsi, par ou mèm, ou té pa kapab shoizi, konmsi dann tout z’afèr la vi ou la bézoin konsèy, par dmoun lé intérésé fé dépans aou !

Mé dé foi, si ou i rogard byin, ou i oi dé shoz i pé ransègn aou déssi lo mové plan déssèrtin l’apré maté : par égzanp, afébli nout bann prodiksyon pou ranfors lékonomi d’kontoir...
Mi sort oir in gran pano avèk in boit délé an kartron : sa in produi "le paysan breton", avèk lo pri, 79 santime, in lite. Lé ga ! in lite dé lé La Rényon i vann plis k’in éro, in éro sink santime par-la...
É la pa aryink pou dé lé… ! Pou si tan tèlmann shoz l’apré fé konmsa ! Ziskakan ? Ziska va tyé nout prodiksyon é nou bann prodiktèr ?

I diré konmsi sa in manyèr pou pini anou pou an avoir manifèsté. Konmsi in pé i di : "A ! zot la vanjé ! Zot i vé bann pri i diminyé ! Bon, bin va diminyé mé sé bann prodiktèr rényoné va gingn lo kou ! Nou va ruine azot, aprésa nou va argoumant lo pri !"

In pé i rod tangaz la ! non ? Si zot i rod ; zot va gagné !
Konm di lo kont : "Sak i plant lo van, li ramas siklone !"

Justin