Matant Zélida la èkrir Justin :

Mon shèr nové, mon spès salté, rouj de fon dovan l’éternité, m’a dir aou franshman mi konpran pou kosa bann rouj-de-fon i èm a fé pèr d’moun konmsa ! Mi pran lo bann sizé inn apré l’ot dann lo dézord é ou va oir si moin la poin rézon : inn lakriz plantèr kann, dé lo bann z’APE, troi lo réshofman klimatik, kat lo rolèvman lo nivo la mèr, sink la kriz finansyèr i sar ro-arivé, sis la guèr ankor la guèr, l’épidémi ankor l’épidémi, l’invazionn La Rényon par bann moun noré pi d’plas pou viv shé zot dann sant-an. Pardon éskiz ! Tro sé tro é pou mon par mi rofiz viv konmsa dann traka anonsé. Tok ! Pran sa pou toi !

Justin la fé pou répons :

Mon vyé matant k’i koz toultan la boush rouvèr, si mi konpran aou i fo zamé anparl lé shoz k’i fash. Pars tout sak ni di lé pa vré ? La pankor fine arivé osinonsa lé prèské sir ké v’arivé ? Kashète aou déyèr in kalimé banbou, ou va débord shak koté... Sak lé myé, sé pa konète sak lé riskab arivé pou sèy anpéshé, sansa diminyé lé konsékans… Si ni fé konmsi dé rien n’été, lé sir nou va prann dann koin figuir désèrtènn shoz é nou nora pa prévi sak i fo fèr dann bann ka konmsa. An kontrèr si ni koné sak lé riskab arivé anou pou prépar la ripos pou nou, nout z’anfan é nout ti zanfan. Anpliské sa ni pé apèl la solidarité épi la fratèrnité pou ède anou é pou nou ède lé z’ot… Amoins ké ou i pans ni pé fèr konfyans gouvèrnman La Frans alé oir li l’apré anlav sé min... Si li zète pa do luil dsi do fé ? Amoins ké ou i fé konfyans désèrtin zéli k’i pran tout problèm grav par dsou la zanm ? Tok ! Pran sa pou ou !