Pou tout sak néna in pti gine mémoir, mi pans zot i rapèl lo tan té pa posib gingn in bon travaye si ou té kominis, sansa si ou la pa ont dir ou lé pou l’otonomi. Mé par l’fète pou kosa mi koz o pasé ? Pou kosa mi didann tan lété konmsa. Zot i pans pou vréman lo tan la shanjé ?

Zot i pans si ou lé kominis, i tras in shomin pou ou avèk pétal roz. Zot i pans si in moun zordi néna dann son kirikilome-vité in bann l’antésédan kominis, lotonomis i rosioi ali avèk kolyé marlé. Zot i pans i bate tanbour pou li, i drèss kabaré an son onèr. Sèryèzman, mi pans lontan té pa konmsa, ézordi ankor la pa konmsa. Mèm in moun na son kart CGTR, la pa si bienvéni ké sa.

Pou kosa mi di sa ozis ? Inn pars moin la parti oir in bon kamarad émi rapèl dann tan, li la domann in plas konm inzényèr léstrisien-alé oir li lé vréman inzényèr-ébin mi rapèl sa konm si lété yèr, é moin la lir sa dann Témoignages, lo ga lété rofizé pars li té tro diplomé. Kominis épi tro diplomé, li la pa gingn in travaye li lété lo pli kapab pou fé.

Konbien moin néna dalon épi kamarad la galéré avan gingn in plas pou an avoir z’ot pourkoi… Arzout ankor bann rényoné lété viktime l’ordonans Debré é la rotrouv azot dann la shèr é dous frans alé oir in pé téi koné mèm pa lo péi laba… zot i pans so ségrégasyon-la lé fini ? Mi pans pa !

Pou kosa ? Pars zot i koné kant mèm i sava pran bann résponsab bann l’antropriz laba dann Paris é sak i pans oir bann travaye konmsa pol anploi La Rényon zot i pé fé in sign do kroi dosi ! Mi sava pa tro diskite an longèr la dsi-mé nou va ravni si i fo - mé sanm pou moin zordi in rényoné kalifyé, désèrtin i pé konsidèr ali konm in danzé potansyèl poul’intégrité d’La frans, in l’anpèshèr tourn an ron pou lo plann ranplasman désèrtin i anparl, anfin in séparatis pou l’avnir.

Sak i kroi pa, i kroi pa ! Sak I kroi I kroi ! Sak I pans li pé naz dann lo troub ébin li naz ! Sak i pans sak té vré yèr sar pa vré zordi konm domin, pans ali ! Mé sak I vé vanj kont sa prépar ali pou vanjé ! Astèr si li di : moin lé ni kominis, ni otonomis donk i ariv ar pa li arien, alé, li pé pran po d’shanm pou pla kouvèr, macaroni pou la bouji.