Pou toute sak néna in pti guine la mémoir, mi pans zot i rapèl lo tan té pa possib gingn in bon travaye si ou té kominis, sansa si ou la pa onte dir ou lé pou l’otonomi. Mé par l’fète pou kossa mi koz o passé ? Pou kossa mi di dann tan lété konmsa. Zot i panss pou vréman lo tan la shanjé ? Zot i panss si ou lé kominis, i trass in shomin pou ou avèk pétal roz ? Zot i panss si in moune zordi néna dann son kirikilome-vité in bann l’antésédan kominis, lotonomis i rossoi ali avèk kolyé marlé ? Zot i panss i bate tanbour pou li, i drèss kabaré an son onèr. Sèryèzman, mi pans lontan té pa konmsa, é zordi ankor la pa konmsa. Mèm in moun na son karte CGTR, la pa si bienvéni ké sa.

Pou kossa mi di sa oziss ? Inn pars mwin la parti oir in bon kamarad é mi rapèl dann tan, li la domann in plass konm inzényèr léstrisien – alé oir li lé vréman inzényèr – ébin mi rapèl sa konm si lété yèr, é mwin la lir sa dann Témoignages, lo ga lété rofizé pars li té tro diplomé. Kominis épi tro diplomé, li la pa gingn travaye li lété lo pli kapab pou fé. Konbien mwin néna dalon épi kamarad la galéré avan gingn in plass pou an avoir z’ot pourkoi… Arzout ankor bande rényoné lété viktime l’ordonans Debré é la rotrouv azot dann la shèr é douss franss alé oir in pé téi koné mèm pa lo péi laba… zot i panss so ségrégasyon-la lé fini ? Mi panss pa !

Pou kossa ? Pars zot i koné kant mèm i sava pran bann résponsab bann l’antropriz laba dann Paris é sak i panss woir bann travaye konmsa pol anploi La Rényon zot i pé fé in sign do kroi dosi ! Mi sava pa tro diskite an longèr la dsi-mé nou va rovni si i fo – mé sanm pou mwin zordi in rényoné kalifyé, déssèrtin i pé konsidère ali konm in danzé potanssyèl poul’intégrité d’La franss, in l’anpèshèr tourn an ron pou lo plan ranplasman déssèrtin i anparl, anfin in séparatist pou l’avnir. Sak i kroi pa, i kroi pa ! Sak I kroi I kroi ! Sak I panss li pé naz dann lo troub ébin li naz ! Sak i panss sak té vré yèr sar pa vré zordi konm domin, panss ali ! Mé sak I vé vanj kont sa prépar ali pou vanjé ! Astèr si li di : mwin lé ni kominis, ni otonomis donk i ariv ar pa li arien, alé, li pé pran po d’shanm pou pla kouvèr, macaroni pou la bouji.

Justin