Dé foi, in pé na intéré tourn sèt foi zot lang dan zot boush avann kozé. Kisa mi pans l’èr mi di sa ? Mi pans in bonpé d’moun, mé zordi, mi pans sirtou in dépité sidis. Li té apré lans son mouvman — sa i gard ali, sé son n’afèr ! — solman li té apré anparl bann kontra d’avnir, é sak li di lé zis bon pou fé lèv la guèr. Li di, gouvèrnman i pèy 75 pour san lo salèr, é la komine, si sé la komine k’i anbosh, 25 pou san solman. La dsi, li azout, i fo avoir movèz volonté pou pa anbosh bann kontra d’avnir.

Dézolé, mounoir ! Pars ou la pa anparl lo kotizasion sosial, é sa i fé in bon moné sa, konm ou i koné, é sé la koléktivité k’i doi pèy sa. Donk, la pa vinn-sink pou san i fo trouvé, mé in ta èk in paké anplis. Lé pa bon di in n’afèr konm sa dann télé, pars tout demoun l’apré rod travay i pans bann koléktivité l’apré rod lo bout é i vé pa fé travay azot, alé oir, solon zot, travay nana. Zot i pans gouvèrnman la pran son résponsabilité, é solon zot, sé lo bann mèr k’i pran pa la zot. Donk, kisa sé l’ènmi dann in ka konm sa ? Sé lo mèr zot i amontr avèk lo doi. Tanka lo boug, mi konpran ali bien vi k’li, pèrsonèl, li vé sort Sin-Zozèf pou èt mèr Sin-Pièr, donk si li gingn z’éléksion, sar pa tro tar pou dir apré 2014 li érit in sitiasion pouri par lo l’ansien mèr. Si li gingn z’éléksion, moin la bien di !... Avèk lo si, noré pi d’boi dan la foré.

Mé sak lé ankor pli difisil pou anvalé, sé sak i vien apré. Lo kontra i dir troi z’an, é kank lo troi z’ané la fini. Sanm pou moin, la loi i lès in sèl posibilité, sé mèt la pèrsone an CDI. L’èr-la, l’afèr lé sérié ! Pou kosa ? Pars tout kontra d’avnir va vni CDI. Lé bien ! Sof ké la plipar bann komine, la Kour réjional bann kont la fine di azot i fo diminié zot pèrsonèl pars lo rasio la pa bon. La fine di azot galman zot na tro d’moun an CDD épi an kontra tan parsiel, donk fo in plan sérié pou la titilarizasion. Titilarizasion ? I vé dir i fo pèy la vi shèr, donk trann sink pou san an plis. Dizon i domann bann mèr poz la mine pou zot, sansa pou sak va vni apré zot, épi pou lo finans la komine. L’èr-la, sa la pa bon ditou, pars l’Éta i défos ali dsi bann koléktivité lokal, alé oir sé kant mèm li lé résponsab l’anploi.

Sak i sèm lo van i ramas tangaz !

NB : Akoz i vanj pa plito pou nout dévlopman ? Donk, pou l’insèrsion par l’ékonomi ! Akoz i lit pa pou bann gran sèrvis proksimité épi l’anvironman ? Nana travay la-dan ! Lo mansonz, konm moin la fine di, pli d’in kou, nana pat kourt.

Justin