Mésyé, Médam, La Sosyété, koz èk moin sé koz èk in kouyon mé sé o pyé d’lo mir k’i oi lo mason. Mi pans konm moin zot i koné provèrb bann fransé i di konmsa : « Sak i sort loin i pé manti san risk. » é sa lé vré pou vréman. Mi rapèl, dann tan la gèr kolonyal, désèrtin landroi bann zarshiv la brilé é i paré in pé la fé pass azot pou d’ot, épi mèm zot la di zot l’avé diplôme zot l’avé poin zot la fé métyé zot la zamé fé étsétéri-étsétéra-la ké lo ra. Ni koné, kan zot i ariv zot néna la ké, mé ni koné pa kèl ké zot néna fransh vérité. Ala pou kosa nout kozman lé inportan vik’li invite anou méfyé bann kabalèr, bann zavantiryé an karton, bann tigr an papyé pars zot lé si tèlman for pou ramass mantèr ké san méfyé ou i tonm dann zot pano. Alé ! Mi kite azot rofléshi la dsi, é ni artrouv pli d’van. Sipétadyé.