Médam zé mésyé, la sosyété, koz èk moin sé koz èk in kouyon mé sé o pyé d’lo mir k’i oi lo bon masson. Mé zami, zot I koné néna dé kozman lé an foutan sa. Pars kan lo boug i di i rest la persone in dèrnyé so pouf é : mi pans li vé lo so dann l’ot koté la vi. Sa in proverb Sénégal sa é mi pans lo moun la di sa la voulii solman gougnardé. Solman sa sé in provèrb donk li doi an avoir in sans zénéral é mi rode lakèl. Mi kakil sak bann jenn jan i fé dann bann vilaz kan zot i alime in gran fé doboi épi brousaye é zot i tant soté pou pass l’ot koté. Mé lé pa rar inn-dé i mank zot l’avantir épi i sote pa asé loin é i tonm dann fé.I bril-bril in pé é sa i fé rir d’moun. Domoun I pans néna dé shoz pli intélizan pou fèr é I vo myé arête fé bann bétiz konmsa. Alé ! Mi kite azot rofléshi la dsi é ni artrouv pli d’van. Sipétadyé.