Mésyé, médam, la sosyété, solon mon léspèryans amoin, néna dë tan out papa sé lo pli for di mond pou ou : dabor kan ou lé pti é li lé vivan épizapré kan li lé fine alé l’ot koté. Pars néna in tan li lé d’van ou, konm in mine pou amontr aou la vi é ou i fé pa in kont avèk sa. Di pa moin zot osi zot i san pa lé shoz konmsa - biensir si zot lé dann mon ka !-Dann promyé ka ou i pass out tan an ladmirasyon pou out papa é si i domann aou kosa ou va fé pli tar, touzis si ou i réponn pa : « konm papa ! » pars ou di galman mi vé ète ponpyé pou tinn do fé, sansa ésploratèr, sansa d’ot kalité d’moun ankor… Fors a fors ou i abityé marsh konm out papa, koz konm li, tous konm li tous,, mèm émite lo grimas li fé dabitd é ou i trouv sa sé sak néna lo pli zoli dsi la tèr. Kan out papa la fini dévir lo do, ou i domann toultan si li lété la, kosa li noré di : fransh vérité, ou i pans ou lé adilt mé dann la réalité ou l’apré toultan rode in konséyé, in gide, in ziz.. Ala koman mi oi lé shoz par moin mèm é mi kite azot rofléshi la dsi. Ni artrouv pli d’van. Sipétadyé !