Médam zé mésyé, la sosyété, koz èk moin sé koz èk in kouyon mé sé o pyé d’lo mir k’i oi lo bon mason. Mé zami avèk kozman-la ni tourn ankor dann Sénégal é péi-la i donn anou in gayar provèrb i pé z’ète vré dann ninport ékèl péi. Lé sir ké si ou i vé rékolt lo myèl ébin i fo ou i fé fass bann moush a myèl pars li donn pa ou son myèl bon kèr é mèm li pé tonm dsi out palto san ké ou i atann. Mé bann éspésyalis pou zot par, i gingn alé tir d’myèl avèk in minimom préksyon mé sa sé sans prop sa. Sans figiré alor ? Sinploman si ou i vé gingn in n’afèr i fo ou i ansèrv out kouraz pou alé rodé. Sansa, san in minimom lo risk, la poin arien po ou. Alé ! Mi kite azot rofléshi la dsi é ni artrouv pli d’van. Sipétadyé.