Médam zé Mésyé, la sosyété koz èk mwin sé koz èk in kouyon, mé sé o pyé d’lo mir k’I oi lo masson. Mézami,souvan défoi, dan la vi, wi viv rant l’anvi épi lo mank d’anvi, wi domann aou si ou va fé kékshoz sansa si wi fèr ar pa. Mwin pèrsonèl mi koné pou désid amwin fèr in n’afèr si mi vé pa, i fo wi lèv bonèr épi wi dor tar. Lo provèrb nou la mark an-o la i amontr koman débarbote aou dann in sirkonstanss in pé difisil : si wi vé fé wi fé si wi gingn, si wi vé pa fé mèm si wi gingn i fo invant in bon rézon konmsa wi rèss poli an rofizan. Mwin na in kamarad kan li té fiyansé li la bien look son fitir madam é kan li la konprann avèk èl i pé pa trouv lo bout si tan tèlman èl va touzour domann ali pou fé dé shoz , li la déside dir li gingn pa.Avèk in formil mazik konmsa ou lé paré pou tout sirkonstans :kouran lé an pane wi gingn pa réparé, lo lévyé lé boushé wi gingn pa déboushé, in pti pane loto wi gingn pa dépané. Konmsa ou lé trankil sof ké sa i marsh in sèrtin tan..Apré i anvoye aou rode in moun pou fé.L’èrla ou lé anmnuiyé konm lo moun i koné fé. Alé ! Mi kite azot rofléshi la dsi é ni artrouv pli d’van. Sipétadyé.