Médam, zé méssyé, la sosyété, koz èk mwin sé koz èk in kouyon, mé sé o pyé d’lo mir k’i oi lo masson. Mézami zot i koné dan la vi i pass pa d’zour san ké ou néna in dizyon pou prann épi kékshoz pou ou fèr, kissoi in démarshe, kissoi in projé é konm I di, souvan dé foi ou lé pa tro anvi fèr, é kan sa i éspass wi marsh an marsh aryèr. Mwin mèm, mi koné pa konbien foi mwin la avanss a rokilon, mé pa arienk in foi, sa lé sir. Kan wi fé, wi fé, mé kan wi vé pa fé, wi rode in léskiz, i di galman in prétèks : lé tro loin, lé tro dir, mi oi pa koman i fo fèr in n’afèr konmsa, kossa mi sava gingn la-dan… Kréol i di défoi in moun i vé konm i vé pa é kan ou lé konmsa lé sir lé shoz i avanss pa. Par kossa in n’afèr konmsa i ariv ? Mi panss sé par l’fète ké ou lé pa bien déssidé, é kan ou lé pa bien déssidé, ou i rode in léskiz pou dispanss aou pou fé kékshoz é final de konte wi vé pa fèr. Alé ! Mi kite azot rofléshi la dsi é ni artrouv pli d’van. Sipétadyé.