Mésyé, médam, la sosyété, mi pans konm moin, l’ariv azot in zour domann in sèrvis in moun é avan domandé soi zot la di dann z’ot kèr lé sir li va fé, sansa zot la pans lé sir li va trouv in rézon pou pa fé. Normal, la vi lé konmsa ! Soi li di oui soi li di non é tout fason ou i sava poz ali in késtyon difisil pou réponn. Si ou i konpran pa moin sèye mazine ou mèm si ou té la plas l’ot, kosa ou noré fé, problèm li nora trouvé pou réglé, lanspèk li nora trouv dann son shomin. Mazine ou mèm in pé tout kalité pansé va pass dann son tète é final de kont kan li sar fine pran in désizyon lé posib li va trouv la pa lo méyèr solisyon. Biensir la pa parèye kan ou lé an sèrvis komandé : komandé i fo égzékité, mé lo problèm i komans kan ou néna lo shoi, lo shoi pou di oui, sansa lo shoi pou di non. Alé ! Mi kite azot rofléshi l dsi é ni artrouv pli d’van. Sipétayé !