Sa in kozman mi èm bien pars li lé kaziman optimis vi ké li asplik anou si nou nana la volonté ni pé ariv a fé sak ni vé. Hmmm ! Pli fasil a dir k’a fèr pars avoir anvi sé kékshoz, dir ké ou i èmré bien sé in n’ot shoz mé la volonté, sa i trap pa sou galé. An avoir la volonté sa lé pa doné ditou ! Biensir si ou na la volonté ou i pé fèr dé shoz… Pa trap la line avèk lo dan kant mèm, mé in shoz lé a out porté, akoz pa ! Kosa zot i anpans ? Arien ditou. Fé travay z’ot koko ! Fé bouy z’ot matyèr griz ! zot va oir ké, rant-rant, ni pé z’ète dakor, rantre nou.