Nout rovandikassion Osséan indien zone do paix i éloign de nou firamézir. Ni koné sak i éspass rant L’Inn épi lo Pakistan, ni koné galman Zétazini épi d’ote ankor i pran la Chine konm zot pir ènmi é la Chine lé pa tro loinn losséan indien. Ni koné ankor l’anvi bann zétazini épi son konpliss Israel pou kraz l’Iran sansa rabèss gran péi-la. Noré ankor bonpé zafèr pou dir dsi lo klima d’guèr l’apré dévlop dann nout loséan indien.

Lé possib in pé i pé dir si néna la guèr dann nout landroi i toush ar pa nou mé antanssion d’apré sak mi oi. La franss i rode pa la paix pou nou. El i rode sirtou an avoir in pozission prévilézyé dann lo mond é biensir ossi dann losséan indien… romark anou bien la franss néna son bann zalyé é son bann zalyé néna son bann zènmi alor dann in kontèks konmsa zot i panss vréman la guèr va évite anou lontan ?

Sirtou ké opliss i sava, opliss La franss i vé transform anou an baz militèr é si in péi i fé sa, lé riskab d’ote i antour konm alyé sansa konm énmi é tardra viendra mé la guèr lé possib k’i pète.

A ! oui ! i paré si wi vé la paix wi prépar la guèr. Zot i kroi sa zot ! Pou mwin sak i prépar la guèr va tonb dan la guèr é néna in sèl fasson tonb dan la pé sé prépar la pé.

A bon antandèr salu !

Justin