Na in patoi i di konmsa : « Fotbal, nana vinn-dé bononm déssi térin, é pou la finisyon, sé l’Almagn k’i gingn ! ». Sa sé pou fars in pé, mé sak lé sir, fotbal i zoué rant dé l’ékip, é dann in l’ékip, toulmoun i zoué — i doi zoué ! — ansanm-avèk. In éspor koléktif i doi zoué an koléktif. Sa in n’afèr fasil pou konprann. La pa bézoin gingn fé tourn in tab pou dékode in kékshoz konmsa. La pa bézoin non pli an avoir bak+25.
Zistoman, la fé l’Érop pou zoué groupé… pou ète an parmi é pa z’ète tousèl… pou parlé d’in sèl voi. Romark bien, i antan souvan in sèl voi, mé la pa la voi lo prézidan l’Erop vi k’la-ba na poin prézidan. Donkalor, la télé i fé antann anou in sèl voi, sète Sarkozy. Pétète lé z’ot i koz, mé i donn pa zot la parol. Si té i fé antann azot, nora fé in spès kalité dézord, in sort kaloubadia pèrsone n’ora pa konprann arien. Donk i antan Sarkozy, apré koz déssi toute, apré koz déssi arien. Konm di bann filizof : « mi koz, donkalor mi égzis ». Li pans pa, pars son lang i bate pli vite ké son sèrvèl i kalkil. É, Baya ! Antansion lo bann kozman. Sa lé kapab fé déklar la guèr inn-a-l’ot.
Zot i ansouvien zistoir la Tunisie ? Zot i ansouvien zistoir l’Egypte ? Moin lé sir ké oui. Zot la antann la voi l’Erop zot ? Forsé, si la France i pran lé z’ot pou moin é arien, si sé li k’i koz san pran l’èr avèk lé z’ot, si sé li ki koz tor-an-travèr. Si i kontinyé konmsa, mi oi pa l’Erop koz égal-a-égal avèk l’Amérique, la chine, l’Inde, la Russie épi bann péi émèrjan. Konm di lo kont, épi méssyé Molotov, in l’ansien minis l’URSS : « Sak in bèf i pé fé, in zèf i pé pa ! ».*

* Ce qui est permis à un bœuf n’est pas permis à un œuf.

Justin