Oté

« Sak in vyé moun i oi asiz, in jenn i o pa dobout »

In kozman pou la rout

Justin / 26 novanm 2018

JPEG - 43.6 ko

Dann nout sosyété néna in rolizyon, sanm pou moin, I apèl rolizyon la zénèss. A la zénèss ! Sa sé la boté, l’intélizans, lo savoir, la fors, la kapasité é la plipar rant nou i vé arienk in n’afèr : sé rèss jenn tout z’ot vi. Pou rèss jenn i kass pa la tète fé z’opérasyon, pran in bann drog ni koné pa léfé, dépans larzan. Mé dann tout péi é dann tout sosyété lé pa konmsa. Dann l’afrik laba, bann zansien i group dsou pyé baobab pou diskité - pou palabré i di sa. Bann jenn i vien oir bann vyé-bann saj i di sa - pou dékouv z’o l’avnir, pou rouv zot shomin. Dann péi japon bann pli gradé dann zido sé bann vyé pars néna in bonpé shomin pou ariv bann sintir rouz sansa blan épi rouz. Astèr si ni arvien vizit inpé nout kozman, ni pé dir in vyé moun la sitèlman vi é sitèlman kalkilé, li la tèlman rofléshi li pé oir lé shoz néna déyèr lé shoz-sak in jenn va dékouv li galman in zour mé pa koméla. Alé ! Mi kite azot rofléshi la dsi é ni artrouv pli d’van. Sipétadyé !