Mi pans sa i romont dann tan sak té i vol, té i fé sa pou gingn in boushé manzé. Koméla, la pi konmsa san pour san. Mi koné désèrtin l’androi i vol pi pou manzé mé arienk pou an avoir in sipléman-konm i di sa dann shanson Fourcade. Kékshoz konm in loizi an plis, sansa in zé éléktronik, sansa ankor in sigarète la drog. Biensir, la plipar d’moun i konpran pa in n’afèr konmsa, i di afèr volé si ou na tout out nésésèr. Mé oila, si désèrtin lé ankor dann z’ot bézoin primèr, nana d’ot la fine sote sa épi lé dann z’ot bézoin ségondèr é mèm pliské sa. In moun vant plin, son famiy lo vant lé plin, i sava pa rode in boushé d’ri pou volé. Si li nana in l’adiksyon par raport la boisson, sansa la drog, ou i konpran toutsuit pou kosa li sava volé. Alé ! Mi lèss azot réfléshi la dsi é ni artrouv pli d’van sipétadyé.