In nouvo Vis-prézidan pou Sésèl.

Zot i rapèl, moin la anparl azot la démisyon lo prézidan La Répiblik Sésèl James Michel. Dopi lo kinz oktob lo nouvo prézidan sé Danny Faure. An pliské sa l’asanblé la nonm Vincent Meriton konm nouvo vis-prézidan pars bann dépité l’opozisyon dizuit an tou la fé l’abstansyon, l’alyans lo pep, parti lo prézidan nana katorz dépité... Dsi sis minis lo prézidan la prézant dovan l’asanblé, troi solman la ging l’akor é troi la gingn z’ot erès trankil ziska ké lo prézidan i arprézant d’ot… L’avé in pé ralé-pousé dann l’asanblé – in pé la transyon konm i di sa. Sanm pou bann z’obsèrvatèr lo prézidan épi lo nouvo gouvèrnman nora poin in rol fasil vi ké ziska zordi li lé minoritèr é l’opozisyon i vé zoué son rol. Nou va suiv l’afèr é ni mank ar pa donn nouvèl nout bann léktèr pars sak i spas dann Sésèl i intérès anou bien.

Shantyé pou répar déga siklone dann Farquhar(Répiblik sésèl).

Apré la politik, la natir ! Pou sak la parti Sésèl, zot i koné sé in péi rish késtyonn bio-divèrsité. Mi pans zot i koné nana osi in bannzil in pé éloigné par raport Victoria konm Aldabra épi Farquhar, lo klima lé pa lo mèm é Farqhar la gingn na apopré sis moi in siklone bien for. Si tèlman k’i fo rokonstrui lo bann batiman épi l’otèl galman. La rokontriksyon la fine komansé la-ba é bann konstriktèr va réspèk bann norm anti-siklonik é sa lé bien nésésèr kan i tienbo kont la fors lo van k’i tourrbiyone. Pars souvan défoi lo van i souf par-la troisan kilomète par èr d’tan é zot i konpran kalité déga sa i fé.

La Répiblik la Chine Popilèr la rofé la télé bann z’il komor.

Na poin lontan moin la antann dsi télé komor in bann diskour pou fé l’inogirasyon lo nouvo l’instalasyon la télé. L’avé lo diréktèr la télé, l’avé lo l’anbasadèr La chine épi l’avé osi lo minis la kultur la Répiblik Islamik komor. Moin la antann La Chine la invésti par-la san vin milyon l’éro pou modèrniz la télé. Arzout èk sa in l’invèstisman pou mète in télé nimérik dann Mohéli pou komansé épi va mète dann Anjouan épi Grann komor. Lé bon pou zot pars lo péi la bien bézoin in bon l’imaz épi in bon son.

Dann Burkina Faso, Monsanto la gingn in kou d’kongn pou son koton OGM :

Dopi sèt’an Lo Burkina la désid plant koton OGM, Monsanto la fabriké. Mé dopi lo komansman bann plantèr koton la bite dsi in problèm : z’ot koton i vann mal par raport lo bann fib lé tro kourt. Afors réklamé, épi réklamé, bann péizan épi lo nouvo gouvèrnman la désid arplant lo koton tradisyonèl, san l’angré, san lézèrban épi san produi shimik. L’èr-la figuir azot lo rann man la komans amélyoré é lo pri la rogoumanté dsi lo plan internasyonal. Monsanto la di sé pars bann plantèr la pa gingn réspèk bann konsign, mé bann plantèr la mète son balo déor épi gouvèrnman la di li vé pi antann parlé lo koton OGM. In bon léson pou Monsanto antouléka !