Oté

Sak lé fé lé fé, mé si li lé mal fé li pé z’ète défé, pou li z’ ète rofé

Témoignages.re / 29 mé 2018

JPEG - 43.6 ko

Na poin lontan la rout litoral té fèrmé pars dé kamion la vni bite inn avèk l’ote, si tèlman la anbar lo total kapital épi la diréksyon bann rout la désid fèrm tout é si zot i rapèl bien dsa la komans in pé apré sink èr d’matin pou fini-a domi !- apopré dsi l’kou d’ névèr.

Bien antandi sa la spass in zour d’légzamin pou in bann jenn téi sava pass konkour pou aprann bann métyé la médsine : médsin, dantist, fam saz é koatéra. Donk sé l’èr bann jenn la komans sone radio fridom pou konète kèlèr i rouv lo zafèr é konm lo radyo té i koné pa ditou sa téi done bann konvèrsasyon mi ézite pa a dir dsi réalis : inn i di li vé savoir kélèr kla rout i rouv, lo lanimatèr i réponn li koné pa, lo tantine i arréponn si i koné pa koman i débrouye astèr. Pars pass in an pou prépar in konkour épi oir sa shap dan la kol, lé pa intérésan ditou.

Pou finir lo réktèr la roport lo kon kour é sak té la la komans bayé z’ot tour pars zot l’avé pran z’ot prékosyon épi lété posib zot noré d’ot konkour pou pasé... Final de kont in jenn fiy la di : « Si l’avé pa arète lo tram trin, èl noré pri lo train é ko nmsa pa d’sousi ! ». Mé i paré son famiy l’avé vote kont Paul Vergès é lété kant mèm Paul téi port projé-la.

Lo lanimatris la fini par di : « Sak lé fé lé fé » é néna poin pou pou artourn dosi. Dézord dann park kanar rant sak i di lété pa posib done Paul rézon épi sak téi réponn : inn foi k’in boug l’avé in b one idé, patati, papatata... Poitan, solon moin, si in n’afèr lé mal fé i fo défé ali pou li ète rofé. La abandone in bon projé a tor, donk pa d’pétar i fo rolans ali in poin sé tou.

J.B.