Dépi in an, Didier Robert lé prézidan la Réjyon. In an, sa lé long é sa lé kourt an mèm tan. Dann in an, ou na lo tan pou fé out shoi, épi pou done in diréksyon out politik. Mé dann in an, ou la poin vréman le tan pou fé bann shoz inportan, bout-an-bout.
Donkalor, si ni kalkil in pé, ni pé an avoir inn-dé sign déssi sak prézidan-la lé kapab fé ;

Lo boug la nyabou siprime pou kat san milyon l’éro shantyé dan la komine Tampon. Sa sé in n’afèr lé inportan ; Si ou i fé shantyé pou tousala larzan, ou sé in batisèr, mé si ou i kass pou kat san milyon, ou lé pi in batisèr, ou sé in dégrénèr. Méssyé Didier, lo dégrénèr ! Kan li la rant la Réjyon, li la di li sava trass in tré déssi la zéotèrmi é li la trassé. Li la di ossi, final de kont, l’énèrz marine i intérès pa li. Gouvèrnman la done ali la résponsabilité déssi Gerri, é bin, li la anvoy sa dann fon ranpar. Pou finir, li la démonte lo plan pou l’otonomi dann lénèrzi ; Li la kass la MCUR avan k’i fé, mèm si bann demoun bien kiltiré, demoun issi é demoun déor, lété pou sa a san-pour-san. Li la kass lo trin, mèm si dann in bonpé péi, l’avnir sé zistoman lo trin. Ala in vré bilan pou in dégrénèr !

In ga la di amoin konmsa : in bon zournalis i anparl pa tousa. In bon zournalis i rogard lo fé di zour. Lo fé di zour ? So kou issi, sé kossa ? Sé lo vèr Thien-Ah-Koon la pète an flèr déssi la tab. Sa in nouvèl lé inportan ! Lé z’ot shoz i kont mèm pa pou la po patate !

Justin