Zot i koné kan l’aktyalité i balans aou in n’afèr dovan out zyé sansa dann out zorèy, la pa forsé ou na vréman in l’opinyon dsi. Mèm, i ariv ou la poin okin l’opinyon dsi la késtyon. Pars ou lé pa asé ranségné ? Pétète. Pars ou fé pa tro in ka èk sa ? Pétète. Sansa pars ou i ésèy démay lo vré avèk lo fo, lo bon grin avèk l’ivré, mé ou i ariv pa. Pars dé foi, i fo lontan avan ou i gingn avoir in l’opinyon in pé fèrm dsi in késtyon. Sirtou kan sé in késtyon i konsèrn la sivilizasyon, i konsèrn la sosyété... Na in bonpé déba dann la sosyété fransèz épi forséman sa i pous ziska La Rényon. L’avé la késtyon la pène de mor, épizapré la késtyonn l’intéripsyon la grosès, nana touzour la késtyonn l’étanazi é dopi in bon koup de tan nana in késtyon, mi pans lé inportan. Gouvèrnman i apèl sa maryaz pou toulmoun, d’ot i di lo maryaz omo. Di kom zot i vé, mé sé maryaz dé moun mèm seks. I fo rokonète, in bonpé rant nou lé pa paré pou mazine in problèm konmsa la tète froide, san k’la pasyon i pran la plas la rézon, san k’bann prézizé i arvien épi i anpèsh oir klèr.

Pou mon par, kan moin la poin in l’opinyon dsi in késtyon, mi komans par rogard in pé kisa lé pour, kisa lé kont, kèl sé zot zargiman. Fransh vérité kan mi apèrsoi bann moun la droit dir lé kont, konm zot té kont lo paks, konm zot té kont labolisyon la pène de mor, konm zot té pour lo koté pozitif la kolonizasion, l’èr-la, konm moin pèrsonèl mi partaz pa, an zénéral zot poinn vizé, moin na konm k’i diré l’anvi pa ète dakor èk zot. An plis ké sa, kan mi antan in pé zot zargiman kaziman omofob moin lé ankourazé pran lo kontre pyé. Arzout èk sa, kan mi antann in pé apré di bann zanfan lé riskab ète dann danzé..., konmsi zordi bann zanffan téi viv touzour dann l’amour épi la sékirité. L’èr-la mi pans sak i vé tro prouvé i prouv pa arien é mi partaz pa zot poinn vizé... Zis dé pti mo pou fini. Dann l’Espagn, la fiy éné l’égliz konm i di, la fé lo maryaz pou toulmoun épi kan la droite la pran pouvoir èl la pa kass lo loi ziska zordi. Mi koné dann l’Amérik nana plizyèr l’éta la fé in bann loi parèy. Parl pi dann l’Erop di nor. Mi pans pa sa la tro bouskil la sosyété. Mi kroi pa bann péi-la la mète azot dann pouvoir Satan. Moin lé sir so loi "maryaz pou toulmoun" i sava pa détrui La France épi La Rényon. Mi antan Monségnèr l’évèk i di sa la pa moral épi li arzout « sak lé légal lé pa forséman moral ». Li na rézon mé sa sé in vérité demoun i koné. Sa la pa nouvo ! Monségnèr, ziska prézan la abityé anou èk in manyèr pansé pli konplèks, pli élaboré, pli ékilibré. So foi isi, mi trouv lé in pé sèk-sèk.

 Justin