Konm di sa majèsté Bogoss premyé, roi la Réjyon, nou sé in réjyon fransèz. Bone afèr ! Toute sak nana an Frans, ni sava gingn issi. Bone afèr, movèz afèr ?Pars la-ba nana la kriz é l’apré raz la pinte in pé partou. Si pou dé pèrsone k’i sava la rotrète i ranplas aryink inn, la pa bon. Si i fé sa, dann Lédikasyon nasyonal, dann la Polis, dann toute sèrvis piblik... movèz piosh pou l’anploi. Konm va aplik anou la réform rotrète, zot i oi in pé. L’État i ranbours pa son dète bann Konsèy zénéra, la-ba konm issil... i foute anou d’dan pou plis troi-san trante milyton l’éro. Parl pi la diminisyon bann kontra édé, épi toute z’afèr la kass sosyal.

L’avantaz, sak lé bon va aplik anou ! Pa sir, ditou. Mi sort lir, an parmi bann gran shantyé, na poin innn v’arété la-ba, mé na dé lé kalé issi : Tram-train é la Mézon dé sivilizasyon. Dann transpor, va mète di gaz déssi lo raye. Sa lé byin bon ! Mé la-ba, pa issi. I fo dir la pa solman gouvèrnman l’otèr, bann blé-é-blan la droite épi bann blé-blan-roz parti sosyalis l’otèr galman... dizon zot la done gouvèrnman la droite son kontantman par avans. É nou, é nou, é nou ? Nout kanar lé noir, nout dévlopman an pane, nout dévlopman dirab plis k’an pane.

Sak lé mové ? Nou lé sir gagné. Sak lé bon ? Sé in n’ote afèr.

Justin