In foi li la anparl anou l’URSS é son minist zafèr zétranjèr, Méssyé Molotov – mi panss – é konm dann tan la l’avé la guèr froide l’URSS épi Zétazini lété toultan apré rode dézorde inn avèk l’lote, morde lo kin épi lo kl’ote é lo minist zafèr zétranjèr La Franss té toultan apré pran parti pou bande zamérikin, pou roprosh l’URSS pars noré fé sossi, osinonsa noré fé sola. Donk in zour lo minist zafèzrzétranzère l’Urss la réponde ali kozman mwin la marke an-o la k’in bèf i pé pèrmète ali fé dé shoz k’in zèf i pé pa.

Kan mi rofléshi bien zordi mi oi bande turc i otorize azot fé dé shoze ké lo pèp kurde i pé pa otorize ali. Mi oi ankor la Libye lo kolonèl Kadhafi la pèye shèr son volonté lindépandanss. Israel avèk l’amérik i pé pèrmète azot kraze lo pèp palestinien. Dovan La Chine mi oi bien in pé i fé pate an vélour. Néna dé guère dann moiyin oryan lé inzist puissance 12 é sé bande pèpe k’i trinke.

Mi anparl pa lé Chagos mé nou rényoné ni koné par kèl tourman pèp-la l’apré passé.

Mi oi zot i sava anparl amwin la Russie avèk l’Ukraine mé mwin mi diré plito La Russie avèk l’Otan apiyé par l’Amérik é dann in ka mi diré la pa in zé d’pongn rante in pti épi in gran mé rante dë gran é bien malin sak i pé dire koman lé shoze va fini… Dozado ? Pétète. Antouléka la pa la propagande bande gran zazanss i débite va done anou la solission.

Ni pé dire ramass mantère é va rèss touzour in n’afère – La diplomassi Hitler téi fonksyone déza konmsa. Ni pé dire ankor lo mansonze néna pate kourte, sansa son teryé la pa tro profon. Ni artrouv pli d’van.

Justin