Mi koné pa pou kossa, mé i arsanm inn-dé politik i rode pran la plas lo lion : sak la tonm atèr dimansh lo sèz dann Sintandré. Dann zot léspri, lion-la i arlèv ar pi. Anfin, konm di la shanson : « Ki vivra, vira ! ». Alor, in pé la désid, solon moin, pran son plas a droit-droit ; in poin sé tou ! I fo dir nana zéléksion i vien, épi in pé i kalkil arienk sa, épi pa solman kan zot i lé apré razé granmatin.

Dimansh, in pé la figuir l’assiz : zot té i kroi zot té sar manz manzé kui. Mank dé po, zot la gingn in rèst trankil. Disnèf voi solman pou lo mèr Sint-mari, kont trante pou madam Dindar. Tanmié ! Tanmié sirtou, akoz in mazorité la mète dakor pou fé in bon politik dann konsèy zénéral, pa pou donn plas inn-dé konséyé. La Rénion lavé bézoin in nafèr konmsa, akoz lo tan k’i vien sar dir, épi sar inportan.

In sèl rogré : pou moin, nora fali in bon diskission pou mète anlèr in bon politik, épi près tout bann konséyé dakor avèk in bon prozé pou La Rénion... Domaz, la pa gingné. Rozman la gingn fé sak la fé : in prozé pou La Rénion, avèk in mazorité tout autour.
Konm dann tout zafèr, nana sak lé pièg épi sak lé bien, anfin près bien.

Justin