Zot i koné la shart éropéène bann lang réjyonal ? Sa sé in n’afèr i romont l’ané 1992. La frans, pou son par la sign sa l’ané 1999, mé ziska zordi la pankor ratifyé lo shart.Pou kèl rézon ? Pars dann l’opinyon piblik na d’moun la pèr sa i dislok in pé l’inité La frans, é sirtou pars dann l’artik2 la konstitisyon lé marké la lang nasyonal sé lo fransé. konsèy konstitisyonèl la fine mète an gard kont in shart riskab kontrodir so lartik 2.

Koman La frans i pé ratifyé shart-la ? Dé manyèr. Soi i fé in référandome épi i domann bann fransé vot pour, mé gouvèrnman lé pa tro dakor avèk lo késtyonn référandome. Soi la shanm dépité épi lo séna i réini dann in kongré épi i vot pou ratifyé. L’èr-la, i fo in majorité troi sinkyèm é sa la pa gagné par avans... François Hollande dann son propozisyon niméro karant-uit la di li lé dakor pou ratifyé la shart mé oplis i sava, oplis li lé pa popilèr...Alors ? zot i oiin pé lo problèm !

Dopi mèrkrodi aprémidi bann dépité la diskit dsi la shart é zot i doi voté mardi 28 zanvyé dann l’aprémidi. Aprésa, mi sipoz lo séna va fé parèy son tour é si lo mouvman lé bon va réini lo kongré. Akoz mi di si ? Koméla nou lé dann l’ané 2014 é bann zélu lé kant mèm pa boushé . Bann lang réjyonal la fine ranport kék batay é isi mèm nout kréol la fine fé in bon bout shomin dann la tète demoun pou nout lang fé son rantré ankor pli for dann l’ansègnman é dann bann l’administrasyon. Plizyèr komine la fine sign in shart biling avèk l’ofis la lang...Mé sré pa zis mazine na poin d’moun lé kont. Lo konba lé pa gagné avan k’i kroiz.

Pou moin ratifyé la shart sé done plis moiyin pou dévlop épi défann nout kréol rényoné. Sré konm di lo kont in pti pa an avan, mé ni koné la doulèr pou fé in sèl pti pa, isi La Rényon.. Touléka i fo suiv l’afèr, é tout sak lé pour i fo zot i donn la min. donn la min marmay !

 Justin 

NB In pti romark : i paré suivan l’insee 57 pour san bann rényoné i koz é i konpran bien nout kréol. Si i arzout vinn-kat pour san i di zot i koz lo fransé konm lo kréol é zot i konpran lé dé parèy, nout kréol rényoné sé lo lang réjyonal lo pli itilizé par raport nout popilasyon.