An frans lo gouvernman sosyalis lé dan la kol jak soso èk so problinm shomaz. Shak éstan i di anons a nou in bèss pou la mwa proshin, boudikont ni konstat touzour in goumantasyon é dopi in bon koup do tan tou lé mwa, tout séga minm dans. Konm tou lé mwa lo minis di travay i dwa rann kont é tou lé mwa li trouv pa son kont, li pèrd in pé l’èr, li lé fatigé i di. Oblizé tou lé mwa, radoté konm in vié révèy pou di konm sa, lo shomaz i goumant, lo shomaz i goumant, i fatig a li. Li minm li rokoné, li lé an éshèk.

Lo gouvernman té i kont bokou la d’si, rapèl a zot “D’si lo krédit dinpo po lo konpétitivité é lanplwa“. Konbyinn fwa la di a nou, domin sar bon. Lo gro mashin ki dové anbosh tout shomèr la fwaré, lo zafèr la fé plouf i di. Bann sindika la prévni, bann politik la di antansyon, tousala i tyinbo pa dobout, oki bourik. Lo gouvérnman la distribié pliski n’an fo, 25 miliar i di é boudikont la kré ké san mil anplwa, in ryin ditou, in gout do dann loséan, d’apré lé éspésialis.

Dépité d’èl i di, inn dépité sosyalis la dévid son kèr la d’si. Pou èl sé vré in larnak tou so trikmardaz la. Pou gingn larzan, lo patron di médèf momandoné la di konm sa “donn a nou larzan ni sar kré in million lanplwa“ é pou byin taz lo gouvérnman, èk son bann, zot la mèt in ti dantèl si zot véston é si lo dantèl té ékri “in million lannplwa“. Dapré zot kisa lé résponsab dé sa, sak la doné, sak la pran ? Konm kréol i di, sak lé pri, lé pri !