In rétrovizèr sa sé in zoutiy inportan.Pou kosa ? Pars li pé pèrmète anou rogard in pé an aryèr.Sa sé kékshoz néna dann loto, néna dann kamyon, mèm dsi gidon moto épi gidon vélo si mi tronp pa, mèm si néna lontan mi mont pi dsi in vélo...Mé afèr rogard an aryèr ? Afèr rogard an aryèr alé oir sak i kont sé rogard par dovan. Sé son l’avnir ki kont pou l’moun, la pa son pasé,alor pou kosa ni vé li rogard an aryèr plito k’solman dovan.

Kan ou i amenn in loto, sansa in moto, sansa ankor in vélo sak i kont sé rogard la rout pou alé l’androi ou i vé alé,pou évite bate dann fon.Shomin ou la fine fé sé shomin ou la fine fé é la pa sa v’amenn aou landroi ou i vé alé.Donk ni pé dir lé pa itil gard dann rétrovizèr, rogard dovan é rouv bien out zyé pars néna arienk konmsa ou v’ariv o bi.

Solman i di kant mèm :si ou i koné pa landroi ou i sava,majine bien l’androi ou i sort.Pou kosa i di sa ? Mi di pétète pars si ou i koné bien landroi ou i sort sar pli fasil pou ou pou trouv landroi ou i sava. Lo passé i pé klèr nout prézan épi nout fitir, non ? Konète lo passé, pou lo passé, sé in n’afèr i pé z’ète intérésan dsi lo poinnvizé la konésans- in pé va di sé in spékilasyon. Mé konète lo passé pou marsh dann prézan épi diréksyon l’avnir, ala kékshoz i pé ansèrv anou bien.

Dabor ni pé di : sa i pé pèrmète anou pa rofé lo bann zérèr nou la fé, mé galman si i fo, arpran sak nou la fé épi lé bien pou in n’ot zour. Kan in l’antrénèr i diskite avèk son lékip dsi lo match la fine joué, mi pans sé pou li tir sak lé bien é pou rogard a la loup sak lé pa bien konmsa son lékip i pé rofé sak li la bien fé, épi évite sak li la pa bien fé.Donk ala in n’afèr i pé amontr anou i fo pa obliy gard dann rétrovizèr.

Pou bann révolisyonèr listoir sé in n’afèr sèryé épi itil .Pou kosa ?Pars li amontr anou kosa i fo fé dann tèl ka é kosa i fo pa fé dann tèl ot ka.In légzanp : la komine Paris,sa sé in révolisyon la dir kék moi, in révolisyon manké é sa la spass dan La frans ébin in gran révolisyonèr konm Lénine la étidyé sa a fon pou fé la révolisyon 1917 dann in gran péi i apèl La Rusi... Ni pé di ankor bann révolisyonèr in pé tout péi la aprann listoir bann révolisyon an Frans konm in formasyon ésansyèl pou zot.

Na poin lontan dann in konférans l’inivèrsité, moin la antann Fransoiz Vergès apré di dann in vizyo konférans sré itil konète listoir lo mouvman réaksyonèr isi La Rényon. Sé in n’afèr moin la gouté pars si lo mouvman réaksyonèr sé in mouvman kont nou-kont bann progrésiss- mi pans lé pa initil konète son bann poin for épi son bann poin fèb kansréti pou rant an lite avèk li.

Mé zami, mon bann dalon, mi pé dir azot ala sak mi oi dann mon rétrovizèr é sak mi oi, mi pans li lé itil konète, éli lé itil fèr konète nout bann jenn rényoné progrésist ;bien sir mi sidi sa an kék lign solman mé sanm pou moin i pé ansèrv anou bien sak ni oi dann nout rétrovizèr pou noua lé plis dovan.