Matant Zélida la ékrir Justin :
Mon shèr nové, mon spèss salté, rouj-de-fon dovan l’étèrnité mi antann azot malparl dsi gouvèrnman fransé : pou zot gouvèrnman avèk son l’aparèye lokal la pa fé sak téi doi fèr é la pa bien amène la lite kont lo kovid-19. Néna in mo lé tayé pou sak i di dé shoz konmsa lo mo sé « ingratitide ». Oui zot lé ingra, i pé mèm di zot lé san rokonésans.. Bann rouj-de-fon lé san rokonésans pars si nou té pa départman fransé, si nou l’avé pa bénéfisyé bann mézir gouvèrnman la mète an plas, si nou l’avé pa bénéfisyé tout bann prime konm dan La Frans, zot i pé dir anou dann kèl éta nou narté zordi. Dizon nou narté konm dann tan la guèr trant-nèf karant-sink é nou nora fé pityé. A oui ! Nou nora fé bien pityé. Tok ! Pran sa pou toué !

Justin la fé pou répons :
Mon vyé matant k’i koz toultan la boush rouvèr, out kozman i étone pa moin ditou mé moin néna solman in pti zafèr pou dir aou :
Sa téi éspass dann tan l’avé in kriz isi La Rényon é dann tan-la Paul lété prézidan la Réjyon. In zour, moin la antann in zoinalis apré poz Paul Vergès, dann lokal l’alians in késtyon. Lo ga té apré domann ali, si La Rényon l’avé gingn l’otonomi, dann kèl éta li noré té, koman li noré fé pou siport la kriz-Sa téi éspass d’apré moin, dann tan Chikungounia sansa la kriz finansyèr-Nout kamarad la pa lèss ali démonté é li la di sinploman li pans nou noré té dann la sityasion La répiblik Moris é noré pa été si mal ké sa... Sak té vré dann tan la kriz la, mi pans noré té vré dann la kriz kovid. Alor matant, siouplé, arète abèss anou, arète di nou nora pa gingn siporté. Si Moris, indépandan zordi i ansort ali, konm li ansort ali, akoz nou otonome nou noré pa gingn ansort anou galman. Tok ! Pran sa pou ou !