A la déstiné ! Sa sé in n’afèr an kite ta bouète sa ! Si ou lé né pou ète pov, ou i rèss pov. Si ou lé né pou an avoir lo moyin, ou néna lé moyin. An touléka sé sak moin téi kroi ziska k’in zour. Ziska k’in zour moin la pans in formil-kaziman in formil rolijyé-I di : volèr i prospèr pa ! Mé i di galman la propriyété sé lo vol. Alor lakèl lé vré ? Inn konm l’ot lé vré. Moin na konésans in bann rishar la baz zot rishèss dsi l’do demoun o flan. I paré isi mèm La Rényon néna désèrtin la sign kontra vyajé avèk demoun vyé, vyé épi malad é la di banna : moin va pèye azot loiyé, mon fanm va fé la tizane, mon fiy va lir dé shoz pou zot. Na in n’afèr la obliyé la dan zot la bliyé sé dir kisa va donn in bon bouyon d’onzèr. Sak i aksélèr travaye la mor. Alor, kan la komans prèss lo mouvman pou inn, la prèss lo mouvman pou dé, pou troi, pou kate ziska ké lo propriyété i grandi, i grandi, i sort la mèr pou trap la montagn. Mésa ki koné pa bien fé l’afèr ? Bin zot i artonm dann promyé shomin : né o flan, ou i mor o flan. Alé ! Mi kite azort rofléshi la dsi é ni artrouv pli d’van. Sipétadyé !