Mézami kossa issi, i intérèss la mazorité d’moune ? Dabor inn néna lo travaye lo moune la poin assé, épi néna lojman i fé défo pou in bonpé, néna la vi shèr é so léspès fouti panyé la ménazèr i amenn pa arien pou lo konsomatèr, néna ankor nout dévlopman é nou lé privé d’sa pars la foute anou dann in trin i amenn pa nou sa. Arzoute èk sa nout kiltir, nout formassyon é toute sak i fé d’nou bon moune, dann in bon pèp i vé arienk fé son marsh an avan.

Mé kissa k‘té i atande bononm-la téi sava parl bann problèm zéostratézik issi dann loséan indien ? Kissa noré majiné ké li téi sar mète son pyé dann lil Gloryèz épi déklar issi li lé an Frans, alé oir néna in lakor pou diskite dsi bande zil épars avèk Madégascar. Kissa noré majiné li té i sava anons anou in déstroiyé indien issi l’ané proshène i sava instal ali La Rényon.. Kissa noré panss in n’afère konmsa ?

Mésyé lo Prézidan, la pa sa ni rode, la pa sirarm loséan indien nou la bézoin : nou la pa bézoin d’in n’afèr konmsa. La pé, la pa bézoin baze militèr é nou sak nou la bézoin sé la pé. La pé dann loséan indien é l’antante avèk tout nout bande frèr. Méssyé lo prézidan, dévide out tète avèk out zéopolitik a la gomes ! Ranguène oute ranguène. Oute bande brui d’bote, sa i intérèss pan ou sa !

Justin