Mésyé, Médam, la sosyété zot i koné bien néna dé foi bann prézidan i atir l’moun dsi in n’afèr ni pé apèl sa in « leur » épi dann la réalité sé in n’ot zafèr li l’apré avizé. Sa i anpèsh pa zot parl tout zafèr é parl de rien. Sé lo ka la vizite mésyé Ma cron isi La Rényon. Sa i anpèsh pa li koz dsi sak i intérèss Lo moun épi gliss an dous sak lo moun i yèm pa, sak le moun i vé pa, sak i i ntérèss pa zot. Sé lo ka d’lo niméro makronis isi La Rényon.

Kosa i intérèss lo moun isi dann nout péi ? Dabor inn néna lo travaye lo moun la poin asé, épi néna lojman i fé défo pou in bonpé, néna la vi shèr é so léspès fouti panyé la ménazèri amenn pa arien pou lo konsomatèr, néna ankor nout dévlopman la dominasyon fransèz i priv anou. Arzout èk sa nout kiltir, nout formasyon é tout sak i fé d’nou dé bon moun, dann in b on pèp i ésèye fé son marsh an avan.l

Mé kisa k‘té i atann bononm-la i sava parl bann problèm zéostratézik isi dann loséan indien. Kisa noré majiné ké li téi sar mète son pyé dann lil Gloryèz épi déklar isi li lé an Frans, alé oir néna in lakor pou diskite dsi bann zil épars avèk Madégascar. Kisa noré majiné li té i sava anons anou in détroiyé indien isi l’ané proshène i sava in stal ali La rényon.. Kisa noré pansé rant dë grann puisans, l’Ind épi La chine, La frans téi sava mète son né-kaziman mète son kiyèr sal dann man zé i kui pa pou li.

Mésyé lo Prézidan, la pa sa ni rode, la pa sirarm loséan indien nou la bézoin : nou la pa bézoin d’in n’afèr konmsa. La pé, la pa bézoin baz militèr é nou sak nou la bézoin sé la pé. La pé dann loséan indien é l’antant avèk tout nout bann frèr. Nou la pa bézoin bann brui d’bote isi shé nou… Nou néna asé avèk Diégo Garcia é sak ni souète sé lo rotour nout bann frèr shagosien shé zot.

In poin sé tou ! Vide out tète avèk out zéopolitik sis sou la somenn ! Ranbal sa pars la pa ditou sa ké ni vé ! Sak ni vé nou la fine dira ou é ou i vé, ou i vé pa, sé sa ké ni sava réklamé ziskatan nou va gagné.