Si mi di azot sa zordi sé ké, dann tan nou lété ankor marmaye l’avé souvan-défoi, noute mézon, in manyèr éspéssyal pou prépar manzé koshon. Ki di manjé koshon di galman in mélanj bonpé produi ! Mwin lé sir téi mète lo son mayi, téi mète ankor patate kan l’avé, maniok si l’avé, tourto pistash, rèstan manjé, sonz tron-fig batu, é pou insi dir noute manjé koshon lété, i fo dir, in vré manjé koshon. In manzé koshon, promyèr klass si zot i vé.

Li lété varyé pars la pa toulézour l’avé lo mèm bande zafèr dodan. Toutefasson, téi fé pa arien provik koshon téi trouv zot konte…koshon é nou bande marmaye, pars nitil dir azot nou ossi nou téi tir in pé noute tar ladan. Poitan souvan défoi nou l’avé dopin pou gouté, mé sa i déranjé pa nou si l’avé kékshoz an pliss pou amiz noute papiye, pou nou bien salivé, épi anpliské sa pou ranpli noute boujaron.

Fransh vérité m’a dir azot patate i aranj bien la boush sirtou kan i tir sa dann gran marmite manjé. Si l’avé poin patate in morso manyok téi fé l’afèr-mèm si téi falé tir la po dsu. Pars défoi Paulin lo zoinalyé téi koup lo manyok par tronsson, san tir la po. Mi panss té mon papa l’avé di ali fé konmsa pou pa pèrde lo tan.

Poitan mon papa té zanfan avan nou, donk li téi koné bien bande pti malin i sava rode zot ossi provizyon dann marmite manjé koshon. Pé s’fèr li téi di vi ké nou néna dopin, ni sar pa ankor rode manioc, mé kan in moune néna zanfan li doi touzour panssé zanfan néna bonpé l’imazinassion, épi bonpé l’anvi. Toute fasson, dann bande marmaye, inn i amontr l’ote, i amontr l’ot, i amontr l’ote é la konéssans i sirkil in vitèss inkroiyab.

Mi arète la mézami, mé ké mi antan pi azot dir la politik sé in manjé koshon pars si i di é i rodi, mwin sar tanté d’dir, la politik néna du bon é di moinsbon. Sé pétète sa la vérité.

A bon antandèr, salu.

Justin