Kan dann lané 1998, Prézidan Paul Vergès la désid fé avans la Rénion dann shomin lotonomi pou lénèrzi, in bann kador byin instruiyé, shoviy, gonflé é-tout-é-tout la pa s’anpas gougnardé, tir défo, pran pityé pou bononm-la, pars pétèt li la pèrd la rézon...
Poitan, si i azout lénèrzi solèy, sèt lo van, la klimatizasyon par la mèr, la zéotèrmi, la biomas épi in ta manièr dévlop lénèrzi, ou i konpran nana moiyin moyéné, moiyin alé loin mèm, ziska lotonomi. Akoz pa !
Plis i sava, plis i anparl bann batiman èk énèrzi pozitiv, bann lantropriz èk lénèrzi pozitiv, domin nora bann sité, nora bann vilaz, nora ossi bann vil. Alor, baann moun i kroi pa aryin ? Mi promète azot z’ot figuir va asiz !
Éstèr, kan i di konmsa, plis sèz mil pèrsone va travay dann lénèrzi, zot i kroi pa non pli ? Kan i di va fé rosiklaz papyé, métal, plastik... zot i kroi pa ? É si mi di avèk sa-mèm nou va niabou fé nout révolisyon dann lagrikiltir, dann lindistri, dann la kalité d’vi, nou va siprime shomaz èk la mizèr... zot va kroir moin lé débousolé.
É poitan, pa zordi, pa domin, sé sak nou va fé. Sé osi sak nou va angant bannzil l’oséan indyin pou fé avèk nou !

Justin