I di galman sak ou i aprann dann bèrso, ou i rotien ali ziska l’tonbo… Lé bien vré ! Kan ou lé pti marmaye, ou i aprann in bonpé z’afèr. Mi ansouvien in profésèr téi di anou : lang bann shinoi lé difisil, mé marmaye tann i nyabou koz ali. Sanm pou moin sa lé bien vré pars moin la zamé vi in marmaye tann-sof si li lé malad - pa gingn aprann lang son paran. Mi vé dir aprann kozé épi aprann konprann pars l’ékritir sé in n’ot afèr. Agard in marmaye kréol, kan li trap son dé-troi z’an, li koz bien kréol é li konprann bien. Mé pran in gramoun déor, si i di ali aprann kréol, ébin kroi amoin lé bien difisil pou li. Pli difisil touléka ké si li lé isi étan pti. Alé ! Mi kite azot rofléshi la dsi é ni artrouv pli d’van sipétadyé.