Mésyé, médam, la sosyété, néna dé-troi zour moin la di : « Sak ou i kass avèk la boush, ou i répar pa avèk la min ». Sinploman pou dir lo kou doné avèk la min i fé mal, mé langèlman ou i rosoi avèk la boush-la lang si zot i vé - lo dézonèr ou i rosoi, sa i pass pa konmsa. Ni pé di galman la mark lo kou i éfas avèk lo tan, la mark lo mépri i éfas pa zamé. Figir azot avèk la lang ou i pé abèss in moun plis ké si ou i tap ali. Moin lé sir in pé i pans pa konm moin, an kontrèr, zot i pans lo kou i fé pli mal, lo kou i abèss plis lo moun. Sa sé sak ou i kroi kan ou lé anko jenn, mé kan lo tan la fine pasé, ou i komans konprann lo pli for doulèr sé doulèr moral. Alé ! Mi kite azot rofléshi dsu tousala é ni artrouv pli d’van. Sipétadyé !