Oté

« Sak ou i koné pa i pé z’ète pli inportan ké sak ou i koné »

In kozman pou la rout

Justin / 26 zwiyé 2019

JPEG - 43.6 ko

Mésyé, médam, la sosyété, mi pans dann z’ot lantouraz i doi an avoir in mésyé sansa in madam Zésétou. Dann tout famiy, dann tout sosyété néna demoun konmsa é fransh vérité – mèm si ou i aprann déshoz avèk zot - demoun konmsa lé in pé fatigan. I diré shé zot, an parmi l’moun, dann la vi toulézour zot l’apré fé lékol. Na dé foi zot i koné moins sak i fé sanblan ékout azot épi k’i koz pa tro. Dann lo bann ka mi koné néna d’moun lé konm moin in pé azé, in pé izazé, mé zot i pans défoi la viéyès son tousèl la aprann azot in ta zafèr dsi la vi. Mé biensir la pa vré : sak i koné in bonpé zafèr sé ké li la aprann é aprann ankor san rolash konm i di é pa solman dann liv, dann fime, mé an ékoutan d’moun san obliy fé lo triyaz. Triyaz ? Oui, mète la paye in koté épi l’ot koté mète lo grin, sépar lo bon grin avèk lo grin zèrb dofé. Mé tousala pétète san aprann lésansyèl : sak ou i rode tout in vi san trouvé é sirman lé pli inportan ké tout sak ou i koné. Alé ! Mi kite azot rofléshi la dsi é ni artrouv pli d’van. Sipétadyé !