Mi koné pa si zot lé konm moin, mé, dann mon ka pèrsonèl souvan dé foi demoun i di amoin kozman-la . Pa mon zènmi, pa moun étranj mé demoun mon prop famiy i di amoin souvan défoi kozman-la. Romark bien, sa i fé pa moin ni sho, ni fré pars mi kroi dir konm fèr sak mi fé va ansèrv pli tar é anplis kan i fé plézir amoin pou fèr-zot i koné lo plézir sa lé pi for k’in motèr tèrmik, sa !. Zot i pans pa néna ankor d’moun zordi i di travaye dsi la lang kréol sa i sèrv pa inn tyork ? Zot i pans pa Bernard Palissy, kan li la mète son bann mèb dann fé pou sèye rofé la porslène, demoun la pans sak li téi fé téi ansèrv arien. Pli pir la pans son tète té piké. In késtyon mi poz amoin é i ède amoin pass mon tan pou fé dé shoz i sèrv arien sé sa : é si lo rien zordi, lété lo kékshoz pou domin ? In kékshoz an diféré si zot i vé. Konbienn moun la invant dé shoz téi sèrv pa arien, mé la pran la valèr par la suit ? Mi sa pa di azot lo nom demoun mi koné-dann listoir !-la fé sa, mé mi pé dir azot néna in ta plis in paké, plis in takon.sé dir azot i fo pis dis doi pou kont sa ! Alé ! Mi kite azot rofléshi la dsi é ni artrouv pli d’van. Sipétadyé !