Médame zé Méssyé, la sossyété koze avèk mwin sé koze avèk in kouyon, mé sé o pyé d’lo mir k’ i oi lo vré masson. Mézami, mi panss zot i koné kozman mwin la marke an-o la. Si mi tronpe pa kan i di sa, i étoneré amwin i parl de bone shoze-pars i pouré dir fé lo bien demoun é demoune va rand aou an bien. Mé dann lo kozman mwin la marke an-o la i parl band movèz shoz, konm k’i diré tire in vanjans dsi in moun la fé aou d’ tor. Par l’fète mwin la fine dire azot néna toute é lo kontrère d’toute dann band provèrbe. Néna par ébzanp in provèrbe i di : « La passyans i guéri la gal » mé néna in n’ote i di : « Assiz bordaz lo flèv é si ou néna la passyans ou va oir lo kor oute zènmi déssand dann fil dolo ». Inn sé in bon n’afère, l’ote sé in mové zafère. Mé sé la vi konm demoune i di. Alé ! Mi kite azot rofléshi la dsi é ni artrouv pli d’van. Sipétadyé.