Matante Zélida la ékrir Justin :

Mon shèr nové, mon spèss salté, rouj-de-fon dovan létèrnité, mi sorte lir in modékri ou la fé é fransh vérité, mwin la pète a rir. Pou kossa d’apré ou ? Pars dann out modékri-la, ou téi parl lékol épi l’amontraz toute matière dann kréol.. Toute, dopi lo matématik, lanvironemen, listoir, la zéografi, lo syanss natirèl mèm lélokanss ziska, anfin toute sak i aprann lékol zordi mé dann la lang franssé.. Mon pov nové, déza ké dann fransé la plipar bannde marmaye néna difikilté pou aprann-zote i rante lékol bourik, zot i arsorte bourik – i fo an pliss wi vé amontre sa bann marmaye dann kréol. Oté ! oté ! Oté ! Bande roujdefon-la, sa lé danzéré, danzéré, danzéré. Dizon i sava présipite toute bande zénérassyon k’i vien dann la kouyoniss an plin. Mon nové, konm i fé lékol, la pa – pétète-mirakilé, mé néna dé rézilta é sé sa k’i fo pa obliyé. Myé vo sa ké arien ! Tok ! Pran sa pou toué.

Justin la fé pou réponss :

Mon vyé matante k’i koze toultan la boush rouvère, sak wi di la pa pou étone amwin mé m’a dir aou kékshoze : nou kominiss rényoné, nou néna la féblèss donn noute konfyanss lo pèp rényoné, dann son lang fabriké par-li dann noute listoir anou, dann noute kiltir rényonèz sète nou la fé. Wi koné matante mwin lé dakor avèk bande zékrivin, zartist, moune kiltiré, nou néna La Rényon é k’i di, épi i ékri dsi bande bienfé in lansègnman dan la lang kréol rényoné. Matante ni kroi sa san pour san konm bande kroiyan i kroi dann Bondyé an fidélité avèk toute sak la fé ké nou sé nou é nou sé pa lézote. Pé s’fèr sa va fé rigol aouankor pliss mé ri touzour-konm i di dann fransé : « Rira bien qui rira le dernier ! ». Sak va ri kèr klère, sé sak va ri an dèrnyé. Tok ! Pran sa pou ou é mon bon souvnir pou toute la famiye.