Dann nout lang kréol, i apèl sa in sharjèr d’lo. Domann pa moin ousa i sorte in kozman konmsa, pars pétète mi gingn ar pa dir azot lo fonn l’afèr. Lé possib ossi lo patoi la fine oubli in pé ousa li sorte konm toute patoi, konm toute jirman. I pé di ossi in rakontèr d’krak, in pintir, sansa pli sinp, in mantèr.
Dann bann moun an plas la Réjyon, sharjèr d’lo, sa i anmank pa. Dann la kanpagn la di i sava mète dé mil kar déssi bann route. Kan in pé té i di, sa i rogarde pa la Réjyon, zot té i réponn, si lé konm sa, la Réjyon va rogarde sa, dopré, siouplé. Koméla, i di, la pa zot va fé sa, zot na solman moiyin pou éde pou fèr. Myé, zot la zamé di sa ! Poitan toute demoun La Rényon la antann sa. Poitan la télé la bate tanbour déssi sa. Poitan bann gran zournal la droite, zot ossi la bate tanbour la-dsi. Si la pa sharjèr d’lo, sa i rossanm byin. Pliské byin !
Alor, kan in boug i di la finn moi d’aout, va sign in nouvo konvansyon avèk Promyé minis... in nouvo konvansyon Matignon. Kan i di méssyé Fillon la di i toush ar pa in santime déssi sak l’État la promète, va solman ansèrv lo mèm larzan in n’ote fasson. Kèl konfyans i pé an avoir dann in parol konmsa. Koman baz la dsi pou konète sak i sava fé vi k’sak la di, i kass pa la tète pou rakont la krak. An pli ké sa, kan konm di ban politisyin, in promèss i angaz aryink sak i kroi, pa sak i fé.
Zordi katorz d’aout, la finn moi sé dann dé somène. Alors sak va viv va oir ! Qui vivra verra !

Justin