Mézami, mi koné pa si zot koné kozman-la épi si zot i ansèrv de li, mé i fodré. Pou kossa ? Pars toute proverb la travèrss lo tan souvan défoi sé in lésson d’sazèss, otroman in roflékssion bazé dsi bande zobsèrvassion la sossyété.

Pou konprande ali lé sinp é noute toute i fé konmsa mèm : ni rogarde otour dnou, é ni oi dé shoze k’i ral anou é d’ote ki ral pa nou. Nou néna ossi in lobzéktif konm i di.

Si par ébzanp noute lobzéktif sé d’gingn noute sosso, ébin ni rogarde sak i gingn zot sosso é koman zot i fé. Aprésa ni émité, avèk pétète in pti l’amélyorassion kékpar… Lé rare ni sava émite sak i réissi pa dann son lobzéktif, amwwins ké ni pran anou konm pli malin ké lé zot é dann ka-la noute prozé i foir dann 80 pour 100 dé ka.

Sa pou dire azot dann nout sossyté i pèrde pa arien é ni viv zénérassion apré zénérassion dsi sak ni oi dan lé zalantour. Lé bon konm la pa bon : lé bon pars ni baze dsi sak lé zot la fé avan nou é k’la marshé, la pa bon pars nou na tandanss suiv bande modèl é déssèrtin la fine vni « obsolète » mé ni koné pa ankor zot lé konmsa.

Alé ! Mi kite azot rofléshi la dsi é ni rotrouv pli d’van. Sipétadyé.

Justin