Médame, zé Méssyé, la sosyété, koze èk mwin sé koze avèk in kouyon, mé sé o pyé d’lo mir k’i oi lo vré masson.

Mézami, konbien foi étan pti nou la antande armontranss nout momon, kan èl téi di konmsa : ou va done mové zégzanp oute ti frère, sansa oute ti-sèr kan ou téi fé kékshoz té pa tro konforme in bon règ do vi dann la sosyété. An kontrère wi pé ossi, si wi vé, donn lo bon égzanpe. Toute fasson, sanm pou mwin, dann la sosyété ou lé sou infliyanss : ou néna tandanss rofé sak lé zote i fé dovan ou. Mi di pa, souvan défoi, in pé néna limazinasyon dann lo bien konm dan lo mal pars lé vré, ni kontante pa nou fé parèye lé zot, nou lé kapabe fé lé shoze par nou mèm, san oze fé konm lé zote. Donk si ni kalkil bien, ni pé fé lé shoze konm lé zote i fé é si lé bien tan-myé, é si lé mal tanpi galman. Mé ni pé ossi invante lé shoz par nou-mèm : konm mwin la fni di bone shoz konm movèz shoz.

Alé ! mi kite azot rofléshi la dsi é ni artrouv pli d’van. Sipétadyé !