Oté

« Sak wi krash i arvien pa dann oute boush ! »

In kozman pou la route

Justin / 6 séptanm 2021

JPEG - 43.6 ko

Médame zé méssyé, la sossyété, koze èk mwin sé koze èk in kouyon mé sé o pyé d’lo mir k’i oi lo masson.

Mézami, provèrb mwin la marke an-o la, d’apré sak i paré sa in provèrb L’afghanistan – an passan mi salué bande madame la ba pou zot kouraz, é pa gouvèrnman zétazini, gouvèrnman a tou fère – Bon ! Ni rovien dsi noute provèrb. Sanss prope-fasson d’ parlé – ni konpran noute toute kossa sa i vé dir : in krasha i rotourn pa dan la boush lo krashère, normalman, sof dann in montaz déssin animé. Sa ni koné, sa ni konpran, é konm i di : la pa bézoin bak +23 pou konprannin kékshoz konm sa.

Mé lo sanss figuiré, sanm pou mwin lé intéréssan. Pou kossa ? Pars dan la vi, ni oi in kantité d’moune i rojète an parol kékshoz, d’apré zot, i vo pa la pène même parfoi in moune. Pou mwin i fo pa rojète in moune si wi koné pa li bien, si konm bande zindien i di, ou la panklor marsh in somenn dann son savate. Mé si ou la rojète ali, é si talère ou sé lo promyé pou alé tonb a zonou dovan li, mi pé dire ou sé in moinss ké riyin.

Alé ! Apré so bone parol, mi souète zot i rofléshi la dsi é ni rotrouv pli d’van. Sipétadyé.