• Matante Zélida la ékrir Justin

- Mon shèr nové, mon spès salté, ala koman i komans dézord ! Ala koman i komans batay ! Sé kan dann ménaz shakinn i tyinbo pa son plas, sé kan i trok de rol. Sé kan lo fanm i vé pran la plas son mari é le mari son plas lé pri, alors i rès ali aryink la plas le fanm pou prann ! Konm le zonm i vé pa, ala dézord i pète.
Foutor-mizèr d’in sor, lé pa poul i komann dann poulayé ! Sa, bann rouj de fon, koman ou i romark pa sa don ? Tir in pé malol dann z’ot zyé don !

Justin la fé pou répons :

- Mon vyé matant-touzour-dan-l’érèr, sak ou i di, i étone pa moin d’ou : la modèrnis la pa pass koté ou ! Ou la fash avèk l’égalité ! Ou i sar trap sak lé pa bon dann nout tradisyon épi ou i lèv drapo èk sa.
Poitan, poin pèrsonèl, mi pans la démokrasi i doi trouv son plas dann ménaz avèk la libèrté épi l’égalité.
Matant, m’a dir aou in n’afèr : dann déssèrtin péi, le mari, si li vé, épi si son madanm i vé, i pé pran le nom son fanm. Koman ou i trouv sa ? Pou moin, sa lé korèk, provik sé sak bann maryé i vé ! Si zot i vé pou vréman !

 Justin