Lé parti ! Dopi débi d’lané, pétèt minm in pé plis, bon pé d’sal konséy la méri la shanz figir. I apél pi sal konséy, i nonm a li galodrom, rotroman di : ron batay kok. Bin kosa ou vé, zéléksyon lé dann in nan. Inpé la désidé k’lèr la fine soné pou komans kart la zèl, gonf zabo, armont zot kou d’bouton pou war si an fas, néna zèrgo pou réponn. Lo gran raoun final lé programé pou mwa d’mars démilvin, si napwin d’shanzman disi la. Antouka, in shoz lé sir, nora inndé pou gingn galo.

Zistéman, an parlan d’zéléksyon mwa d’mars, épi d’politik, mé lo vré politik, lo vré minm, sa i fé arpél à mwin, a zot osi bli pa, sétané lo PCR i sélèb son swasantyèm aniversèr. E sa i fé pans a mwin k’dann swasantan d’konba pou lo pép Rényoné, pou son dinité, lo Parti la fé fron dann in ta ék in paké zéléksyon, souvan té dann mwa d’mars zistéman : zéléksyon lo mèr, konséy zénéral ou sansa dépité.

An parmi tousa, néna bonpé lé gravé dann lo mémwar koléktif Rényoné. Pou lo p’ti pé mi koné, ék sak bann vyé kamarad la arkont a mwin, avansa zéléksyon té pa karnaval zordi, ni bonbon do myél. Si kékfwa, forstan sobat, navé o bout, in gran viktwar pou not pép, mé navé osi sirtou lo kou, la zol baro 59, épi la mor ék zasasina nout bann kamarad. Ni dwa pa bli sa. Mi azout arpa plis zordi. Tard pa, nou nora lokasyoion arkoz ladsi.

Pol