Médam zé méssyé, la sossyété, koz èk mwin sé koz èk in kouyon, mé sé o pyé d’lo mir k’i oi lo masson.

Mézami, mi koné pa pou koi, mé i fé l’èr kréol la pliss pèr lo mor ké lo vivan. Kan wi parl in mor, i fé pti voi- in pé i arète mèm ziré épi néna la krintiv kan i rèv in mor. L’èr-la i di : « I fo alé domande in mèsse ! ». Ou néna bo dir bande vivan lé pli mové ké bande mor, i di aou oui, mé dann fon d’kèr i kroi pa tro.

Kan i parl in mor i fo touzour dir « san déranz son am » épi i di pa « méssyé », la plipar d’tan i di « lo défin » konmsi sa sé in tite ou la gingn kan ou la pass l’ote kotéd’la vi.

Anfin sa sé pou kozé mé a park’sa la pèr la mor, sa sé in n’afèr la plipar d’moune néna. Mi rapèl dann Marcel Pagnol in pèrsonaz i di : « Mwin la pa pèr la mor, mé mwin la pèr pi ète vivan » é zot ?

Alé ! ni rotrouv pli d’van, sipétadyé.