Si zot la suiv in pé lo sobat-koz déssi RFO, moin lé sir, konm moin mèm, zot la romark déssèrtène shoz... k’i amontr anou, par avans, koman la kanpagn i sava éspassé é kossa bann kandida i sava di bann zéléktèr. Sa lé vré pou bann list lété roprézanté, byinsir pa pou sak té pa la. Si konm moin zot i pans nout péi lé pa assé-sifizaman dévlopé, l’èr-la zot la byin konprann nana in pé kandida i pans pa konm zot. Kissa ?
Par ébzanp, lo madam té i roprézante bann sosyalis la anparl lozman sosyal... lozman sosyal... lozman sosyal, mé ni koné byin la pa la Réjyon k’i doi an okip dé sa, prinsipalman. Ni koné sé l’Éta épi la komine k’i doi okip sa... mi domann amoin mèm si in pé i vé pa fé fèr par la Réjyon, déssi son bidjé rézyonal, sak l’Éta épi zot mèm la négliz fé. Par ébzanp ankor, lo roprézantan Europe-ékoloji : li, pou son par, li vé pa bann gran shantyé, li vé fé tiiii z’afèr. Tiii z’afèr, touzis si, pou l’instan, li domann pa la dékroisans pou nout l’ékonomi. Pou la Droite, lo pli inportan sé kas toute sak la Réjyon la fé dépi douzan par-la, é sak li vé fèr : kass l’IRT, kass l’ARER, kass lo tram-train, anpèsh la konstriksyon la Lézon dé sivilizasyon, fé pèrde la Réjyon son rol l’avan-gard dann dévlopman, épi mète l’Éta anlèr, li tousèl pou okip dévlopman dirab épi la protéksyon la natir.
Orozman, nana l’Alyans k’i vé kontinyé sak la fine fé dépi douzan épi sak lé an kour. Orozman ! Pars san l’Alyans, dizon lé riskab anpèsh ankor in kou nout dévlopman, anbar ali, ankor in kou !

 Justin