Alon arvir in pé, arienk kék zour, dsi lo vin désanm sète ané. Fransh vérité, mi trouv vin désanm sète ané lété bien réisi in pé partou. Bann l’asosyasion, landroi néna, la bien travaye pou roganiz bèl bèl défilé pou mark lo kou lo vin désanm... Mi souvien, fitintan, dann désèrtin zoinal touzis si té i anons pa la mor lo vin désanm konm fète rényonèz.
Sépa si zot i rapèl kan lo pap zan XXIII la désid béatifyé lo frèr skibilion avèk konm zour lo 20 désanm in bonpé krétien la parti laba an pélrinaz. Sé zot afèr mé sak mi rapèl bien sé ké dann in zournal in zoinalis la prèss anons sak i sort ékri an-o la. I fo dir ankor zordi désèrtin i anons la mor lo promyé mé, konm la mor ban sindika. Anfin shakinn i fabrik l’informasyon li pé !

Pou di lo fin mo, vin désanm-fète kaf, sansa fète la libèrté-lé pa mor, é mèm li pran é li ropran favèr d’apré sak moin la vi par moin mèm… Sof ké désèrtin i oi sa konm in fète komèrsyal, in moiyin fé larzan dsi la tète nout bann zansète. I oi pa sa konm in sinbol for pou amenn anou pou rofléshi dsi nout listoir, dsi nout l’idantité, pars pou zot, zot bondyé sé larzan é zot i oi arienk par lo trou zot kof-for.
Pou arzout in n’afèr ni pé di la konsyans rényonèz la dévlopé é oplis i sava oplis i dévlop shé nou bann rényoné é sirman plis é pli vite shé bann jenn. Mé ni pé di kant mèm nou lé dann in kon tradiksyon pars ni pouss pa dsi lo plan politik sak ni pouss dsi lo plan kiltirèl. Ala in késtyon bann militan politik i dovré mète a l’ord di zour zot bann projé.

Romark anou bien ni avans pa non pli konm k’i fo dsi nout prozé ékonomik-nout dévlopman-, dsi nout projé sosyal – la lite kont la povrété-é dsi nout projé d’sosyété-désèrtin parl mèm nout ranplasman -. Donk si nou lé plito avansé dann nout konba kiltirèl néna dé konba ni pèrd térin é sa la pa bon pou nou, sa la pa bon pou abnn rényoné.
Nout rényonèzté i avans mé pa dann tout séktèr li doi avansé. Sé a nou d’ranfors nout poin fèb pars nou la bien bézoin.