Dépi dé-troizan, la-ba dann la Brotagn, dann la Frans, nana in kékshoz i apèl zalg-vèr. Sa in zanr létu d’mèr é sa i pouss partou ziska déssi bann plaj. L’èr-la, i fo tir ali souvan, défoi zour pou zour, pars sansa demoun i gingn pa anprofite la mèr. Mé la pa arienk sa ! Kan sa i pouri, mé z’ami, in lodèr inkroiyab i dégaj. Alor, i rèss aou arienk pou kouri an boushan out né. Oussa sa i sort so zalg-vèr la ? In pé i di sa bann plantèr la fote, avèk lo kargézon l’angré zot i fane, épi arzout èk sa la taye koshon, sansa volay, kan sa i koul partou dann bann rivyèr épi i déboush déssi bann plaj. Bann plantèr i di, la pa zot l’otèr, pars zot i fé in l’agrikiltir rézoné. Bien antandi, gouvèrnman i sèy pa maye ansanm, sirtou i ésèy pa konprann lo fin mo. Donk, zalg-vèr i pouss. Demoun i rash lo z’afèr, zour apré zour ; Gouvèrnman i done in pé larzan épi i anparl pi d’sa.

Ziska l’ané dèrnyèr kan in shoval èk son kavalyé la sèy travèrs lo karo d’zalg. Oté baya, lo shoval la krévé é lo moun la shapé par kou d’shans. L’èr-la, i fé l’otopsi lo shoval. In pé i di, sé lidrojène silfiré i sort dann lo zalg an dékonpozisyon la tyé lo pov zanimo. In pé i di, dolo la pass par l’ti-gozyé lo zanimo épi li la toufé. Mé, ozis, pèrsone i koné pa lo fin mo. Dakor, mé sète ané, so kou issi, sé bann sangliyé k’i krèv par dizène déssi la plaz infékté avèk lo zalg. I arfé l’otopsi, mé i trouv pa ankor in kou lo fin mo. L’èr-la i di, lo bann sangliyé lété anpoizoné... mé avèk kossa ? Lo lidrojène silfiré ou sansa in n’ot poizon ? I rode, i rode, mé konmsi i vé pa trouvé.

Dan la Frans, nana gran-gran laboratoir. Nana gran-gran doktèr ; i paré mèm, banna i yinbou trouv l’introuvab pars zot lé kalifyé vèy pa koman. Si lé vré, mi pans banna l’avé moiyin, dépi in bon koup de tan, trouv ousza lo zalg-vèr i sort épi trouv galman kossa la tyé lo shoval épi bann sangliyé. Sanm pou moin, si zot i trouv pa, sa i vé dir zot na poin lé z’ord pou trouvé vréman. Pars nana lintéré d’moun lé an zé. Pou komansé, pétète, sak i fé lagrikiltir intansiv, avèk in kargézon langré, dézèrban, épi tout kalité produi shimik. San oubliyé bann sosyété kapitalis i angrèss azot de sa !

Justin